50 Jahre Burgfründe: Anekdoten

50 Jahre – da passiert doch einiges in einem Verein.  Gerne erzählen wir hier ein paar Anekdoten…

Blueme

Siiner Ziit hed eine us em Klub es Huus bouet im Rain obe. Eine vo siine Gspaane hed ihm do versproche zur Iwiichig Blueme z bringe. „Die müess är de scho ned sälber chaufe“, hegi är gseid.

Das Verspräche her er denn auch igahlte. Um das neui Huus ume heds blüeht wie verruckt i allne Farbe.
Nume: z Roteburg hend schimbar i velne Gärte d Bluemetöpf  gfehlt.  Die sige uf unerklärichi Wiis plötzlich verschwunde.

Bratwurst

Dass mer nach de Prob no gmüetlich zäme i d Möscht gad und de Durscht löscht isch au höt no so. E Ziit lang esch es aber vorcho, dass es Grüppli Jodelklübler nachher no id Stadt isch go e Bratwurscht ässe.

Traktor

Sit vilne Jahr isch de Tombola Hauptpriis e Tretti-Traktor för Chend. Eis vo üsne Ehremetglider, damals no aktiv im Klub debii, hed au einisch so ne Traktor gwunne. Well sine Sohn noch z chlii gsii isch, hends ne no uf d Site ta. Öpe es Jahr spöter hed är ne de zum Geburtstag öbercho.
Doch wies s‘ Glück so hed welle hed die gliich Familie churz drufabe grad nomal sone Traktor gwunne. De Bueb hed do gmeint, das sig prima, denn de Nachbarsbueb hebi no keine und sie müessid doch beidi chönne Puure. So hend die zwe Buebe vel Spass gha met Traktörle vor em Huus usse.

Morechöpf

Weich no, wenn s’erschte Mal Morechpf be de Tombola verschauft worde sind? Das isch scho bim erschte Konzert 1968 gsii. Die fiired auso au scho de 50!

Bärggwitter

Im Jahr 1982 hemmer am Alpgottesdienscht uf em Wirzweli dörfe go singe. Während de Gondelfahrt is Tal heds uf einisch so heftig afa gwittere, dass d Gondle  hed müesse ahalte. Es paar vo üsem Klub hend meh als e halb Stund müess i de Gondle usharre, bis si  hed chönne wiiterfahre.

Schuebändel

Einisch a de Prob isch’s wahrschiindlich es paarne e chli langwiilig gsi. Sie hend nüd bessers gwüsst z’mache, als eine vo ihre Gspane met de Schuebändel a Stuel ane z’binde. Wo er de ufgstande isch, heds ganz schön poldered…

Pyjama

Eine vo üsne Kollege hed bevor er zor Hauptprob gange isch siinere Frau versproche, er chämi nach de Probe grad hei. Doch wills be de Burgfründe au cheibe gmüetlich isch, isch er doch no met id Beiz. Ölfi nünzg esch er de hei und hed im fiischtere welle s Pyjama alegge. Met de bede Arme hed är die zwöi Löcher gfunde, doch de Chopf hed einfach s dritte Loch ned gfunde. Dor das Zable isch de d Frau verwachet, hed Liecht gmacht und seid, er chönni ehre jetzt ned verzelle, er hebi nüüd trunke. D‘ Hose görid ad Bei und ned öbere Chopf.